Deputeti demokrat Tritan Shehu ka dalë sot me një thirrje të fortë ndaj qeverisë, duke kërkuar që të reagojë për planin e paqes të propozuar nga Donald Trump për Gazën.
Shehu e cilësoi iniciativën si “të jashtëzakonshme”, një përpjekje që sipas tij ofron zgjidhje për një nga konfliktet më të ndërlikuara dhe shumëvjeçare të botës, eliminon rrezikun e terrorizmit dhe shmang vdekjet e panevojshme. Ai kujtoi se plani me 20 pika “duhet duartrokitur”, edhe pse ka vështirësitë e veta.
Ligjvënësi tha se i është drejtuar Komisionit të Jashtëm dhe vetë qeverisë për të mbajtur një qëndrim zyrtar mbi këtë iniciativë amerikane, por deri tani heshtja ka qenë absolute. “Vetëm Sali Berisha dhe unë jemi të vetmit që kemi reaguar e kemi mbështetur këtë plan. Qeveria shqiptare, qoftë edhe formalisht, duhet të bëjë një deklaratë. Përndryshe, tingëllon keq”, komentoi ai.
