Nga studio e A2 CNN, deputeti demokrat Tomorr Alizoti u ka bërë apel qytetarëve që të sensibilizohen dhe t’i bashkohen kauzës opozitare për rrëzimin e qeverisë Rama.
Sipas tij, është absurde të mendohet se ndryshimi do të vijë nga një “magjistar”, pasi demokracia është një proces që lind nga ndërthurja e zërit opozitar me nevojën dhe dëshirën e qytetarëve për ndryshim.
“Jo, jo nuk do të presim, të gjithë ne duhet të reagojmë. Këtu nuk bëhen zgjedhjet. Këtu dalin anonimë të votuar. Kujt i keni dëgjuar ndonjë fjalim politik që ju ka frymëzuar të thoni do votoj këtë njeri? E dini çdo të thotë të marrësh 20 mijë vota? Janë 20 mijë mendje, pa pasur një ditë në politikë. Unë e shoh si mision, i bëj apel qytetarëve të unifikohemi që të rrëzojmë këtë qeveri. Shqipëria ka shkuar në autokraci. Duhet të mobilizohemi për ta ndalur, sepse është një autokraci e binjakëzuar me mafien”, tha ai.
Alizoti theksoi se nuk ka rrugë tjetër përveç mobilizimit popullor, duke marrë shembull protestat në Serbi, ku megjithëse opozita është e dobët, qytetarët dalin vazhdimisht në rrugë.
“Demokracia është një gjë që duhet ta duan dhe ta mbrojnë njerëzit. Rama është kthyer në një Enver Hoxha të një lloji tjetër, jo të Kinostudios ‘Shqipëria e Re’, por të Hollywood-it”, u shpreh Alizoti.
