Tom Doshi nuk e ka nisur fare mandatin e deputetit, pasi dha dorëheqjen që në seancën e parë të Parlamentit. Vullnetit të tij iu bashkua edhe Sabina Jorgo, duke krijuar dy vakanca në qarkun e Shkodrës. Por që nga 12 shtatori, këto vende vakante nuk janë plotësuar.
Komisioni Qendror i Zgjedhjeve njofton se deri tani katër kandidatë kanë refuzuar marrjen e mandatit, dy nga lista e mbyllur dhe dy nga lista e hapur, ndër ta edhe dy zonja. Sipas Kodit Zgjedhor, kur një deputete jep dorëheqjen, vendi i saj duhet të zëvendësohet nga një tjetër grua. Aktualisht, e vetmja që nuk ka dhënë përgjigje është Meri Markiçi.
Në listën e votimit, dy zonjat që dhanë dorëheqjen, Suada Kopshti (12-ta) dhe Migena Kalleçaj (15-ta), janë renditur më poshtë se Meri Markiçi (11-ta), e cila ka afat deri më 28 shtator për të konfirmuar marrjen e mandatit. Nëse ajo nuk e pranon, mandati do t’i kalojë një burri.
Në rast se asnjë zonjë nuk e pranon mandatin, dy kandidatët më të votuar meshkuj nga lista e hapur, Besnik Brahimi dhe Shkurt Lasku, do të jenë në garë për të marrë vendin e deputetit. Ata do të duhet të njoftojnë KQZ-në kur t’u dërgohet ftesa për marrjen e mandatit nga Ilirjan Celibashi.
