Partia Socialdemokrate e drejtuar nga Tom Doshi, ndonëse ka tre mandate në Kuvend, rezulton të mos ketë asnjë zyrë funksionale në bashkitë e vendit. Për këtë arsye, Doshi i është drejtuar me një kërkesë zyrtare kryekomisionerit Ilirjan Celibashi, duke kërkuar që ky institucion të nxisë kryebashkiakët të vënë në dispozicion ambiente shtetërore pa detyrim qiraje nga të tretët.
Në dokumentin e firmosur nga Doshi thuhet se PSD, bazuar në rezultatet zgjedhore të viteve 2021 dhe 2025, plotëson të gjitha kriteret ligjore për këtë përfitim publik.
“Kemi kërkuar paraprakisht nga organet e pushtetit vendor në 60 bashki të RSH-së që të na pajisin me ndërtesë për zyrat vendore të PSD-së. Nga përgjigjet zyrtare, vetëm Bashkia Elbasan ka ofruar një ambient. Të gjitha bashkitë e tjera kanë deklaruar se nuk disponojnë hapësira të lira”, thuhet në kërkesën e PSD-së.
Partia thekson gjithashtu edhe vështirësitë financiare si arsye kryesore të kësaj situate, duke pohuar se vetëm për qira zyrash janë shpenzuar mbi një milion lekë.
“Për shkak të mungesës së likuiditeteve, jemi të detyruar të kontraktojmë ambiente vetëm gjatë fushatave zgjedhore. Kjo na pengon të ushtrojmë aktivitetin politik në pjesën më të madhe të territorit, për shkak të burokracisë dhe mungesës së mbështetjes financiare nga shteti”, thuhet më tej.
Pak ditë më parë, një kërkesë të ngjashme ka dorëzuar në KQZ edhe Partia Mundësia e Agron Shehajt, e cila me dy deputetë kërkon seli qendrore të financuar nga buxheti i shtetit.
