Partia Socialiste dhe Partia Demokratike, në një pakt të heshtur, kanë refuzuar të gjithë kandidatët që janë ofruar si kandidatë për Komisioner kundër Diskrimimit.
Edhe pse në garë janë emra të njohur përfshirë edhe Komisionerin aktual, dy partitë e mëdha nuk kanë mbështetur asnjë kandidat me firmë.
Afati fillestar ishte 30 dhjetori, dhe me vendim të Komisionit për të Drejtat e Njeriut, afati u shty deri në 12 janar.
Por pavarësisht se bënë sikur ju dhanë kohë shtesë aplikantëve, PS dhe PD nuk lejuan asnjë deputet të firmosë.
Kështu gara digjet dhe procesi do të vijojë nga e para: thirrje e re, dosje të reja, dëgjesa të reja, pastaj mbledhje firmash, e në fund, votim.
Kjo skemë lë dyshime të forta se loja për t’ia lënë derën e hapur për këtë institucion gjyqtares kushtetuese, Sonila Bejtja, vazhdon.
Gjyqtares i ka mbaruar mandati në prill, por procedurat e gjetjes së pasuesit, po vijojnë.
Ajo kandidoi për këtë post, por u tërhoq më pas, sepse zëvendësuesi i saj në Gjykatën Kushtetuese nuk kishte ardhur.
Me sa duket, me djegien e qëllimtë të këtij raundi kandidimi, kur të hapet gara tjetër nga e para, gjyqtarja do të jetë liruar nga detyra që mban dhe do të jetë e lirë të marrë bekimin për një mandat 5 vjecar si komisionere kundër diskirminmit.
Sonila Bejtja u zgjodh gjyqtare kushtetuese nga Presidenti Ilir Meta. Edhe pse u perceptua si gjyqtare opozitare, së fundmi ajo ka marrë vendime pro qeverisë. Ajo ishte nga të paktat që votoi pro Edi Ramës dhe kundër Veliajt, si dhe vota e saj ishte përcaktuese dhe mundësoi rikthimin e Belinda Ballukut si zëvendëskryeministre.
Emrat në garë që u dogjën:
1. Arben Shkëmbi
2. Brunilda Menalla
3. Edison Hoxha
4. Endri Papajorgji
5. Ermal Hoxha
6. Ermonela Xhafa
7. Fatjona Male
8. Genta Tafa
9. Gëzim Allaraj
10. Ismail Tafani
11. Lulzim Hamitaj
12. Mirela Rrumbullaku
13. Robert Gajda
14. Sonila Bejtja
15. Sonila Hysi
