Pasditen e sotme, situata paraKryeministrisë është tensionuar sërish, ku janë shënuar përplasje fizike dhe verbale mes efektivëve të Policisë së Shtetit dhe mbështetësve të lëvizjes "Shqipëria Bëhet". Shkak i konfliktit u bë ndërhyrja e forcave të rendit për të hequr çadrën e vendosur në shesh.
Gjatë momentit të ndërhyrjes, protestuesit kanë kundërshtuar efektivët me thirrjet "Turp, turp", duke pretenduar se qëndresa e tyre ishte paqësore. Situata u përshkallëzua kur një prej pjesëmarrësve përfundoi në tokë gjatë tentativës së policisë për ta shoqëruar, çka nxiti reagimin e menjëhershëm të drejtuesit të lëvizjes. Adriatik Lapaj lëshoi akuza të rënda ndaj policisë dhe zyrtarëve të lartë të qeverisë, duke e cilësuar operacionin si një urdhër politik. Ai theksoi se policia po përdoret si mjet presioni ndaj intelektualëve dhe njerëzve të ndershëm, duke nënvizuar se, ndryshe nga protestat me molotovë, tubimi i tyre ka ruajtur standarde paqësore. Pavarësisht tensioneve, policia vijoi operacionin për lirimin e hapësirës para godinës qeveritare.
