Seanca plenare në Kuvend u përfshi nga tensione pasi opozita bllokoi foltoren, ndërsa përplasjet mes deputetëve vijuan edhe më tej në sallë.
Situata u përshkallëzua kur deputetja e opozitës Elda Hoti iu afrua deputetes socialiste Bora Muzhaqi, e cila po fliste nga vendi, dhe i hoqi kartën e deputetit që përdoret për aktivizimin e mikrofonit në pajisje.
Ky veprim shkaktoi reagime të menjëhershme. Muzhaqi iu drejtua Hotit duke i thënë:
“Elda, është e turpshme kjo që po bën. Si mund të marrësh kartën e një vajze tjetër?”
Ndërkohë deputetët socialistë ndërhynë për të ndaluar Hotin, duke shkaktuar debate të tjera në sallë. Në mes të përplasjes ndërhyri edhe Taulant Balla.
Debatet në sallë:
Hoti: Kujdes kur flet ti me mua…
Balla: Ta tregoj unë ty… Mos e prek, kaq po të them.
Hoti: Pse kush jam unë, shoqja jote? Kush je ti?!
Muzhaqi: Elda, është e turpshme kjo që po bën, si mund të marrësh kartën e një vajze tjetër.
Balla: Nuk merret karta e deputetit.
Për shkak të tensioneve dhe bllokimit të foltores, kryetari i Kuvendit vendosi ndërprerjen e seancës për 5 minuta.
