Lidhur me kapjen e autorëve që vranë Gilmando Danin dhe plagosën Muçi Shaljanin në një ngjarje kriminale të ndodhur në mes të ditës, në aeroportin e vetëm ndërkombëtar të Shqipërisë, kryeministri Edi Rama u justifikua duke thënë se vrasësit do të ishin kapur po të kishim vendosur kamerat inteligjente të importuara nga Emiratet e Bashkuara.
Sipas Ramës, “po të kishte halla k…”, sepse me kamerat që kemi, me policinë që kemi, me sistemin e sigurisë së Rinasit, me radarët, me kufirin, me kontrollin e aviacionit, me postblloqet dhe me të gjithë aparatin shtetëror nuk bëhet dot punë.
Ai shtoi se nuk na mjaftojnë as dy satelitët kombëtarë, “Albania 1” dhe “Albania 2”, të cilët sipas propagandës shohin gjithë territorin, dhe as ministrja e Inteligjencës Artificiale, Diella. Për të kapur autorët, duhen kamera të reja që do të vijnë “pas ca muajsh”.
Në intervistën e tij, Rama u shpreh:
“Nëse ne do të kishim këtë sistem në këmbë, vrasësi apo vrasësit do të ishin identifikuar në kohë reale. Projekti është gati, financimi është vënë në dispozicion, kompania është një nga më të mirat në botë, sistemi është i sprovuar në Emiratet e Bashkuara…”
Me pak fjalë:
– atentati ndodhi në pikën më të ruajtur të Shqipërisë,
– autorët u zhdukën pa u identifikuar,
– shteti nuk e pa dot ngjarjen,
– dhe fajin e paska kamera që s’kanë ardhur akoma.
Ndërkohë që satelitët fluturojnë, ministrja e IA-s mban flamurin e inovacionit dhe qeveria flet për “transformim dixhital”, autorët e atentatit në Rinas vazhdojnë të jenë “në drejtim të paditur”, ndërsa shteti ende pret kamerat shpëtimtare të Emirateve për të bërë punën që duhej ta bënte vetë.
