Debati për çmimin e naftës në Parlament u kthye këtë të enjte në një përplasje të fortë mes Sali Berishës dhe Erion Braçes, por në sfond u duk qartë edhe një tjetër betejë: ajo mes Braçes dhe Belinda Ballukut brenda mazhorancës.
Teksa akuzoi qeverinë për vendosjen e “taksës më të lartë në botë” mbi naftën dhe foli për kontrabandë masive të karburanteve, Berisha zgjodhi që shigjetat më të forta t’i drejtonte ndaj Erion Braçes, duke e quajtur hipokrit dhe mashtrues ndaj fermerëve.
Madje, në një moment ironik, kreu i PD-së u duk sikur mori anën e Belinda Ballukut në konfliktin e heshtur me deputetin socialist të Fierit.
“Po të hoqi Lubia nga Fieri, dhe tani nuk pyet më për ta fare. Mirë ta bëri!”, iu drejtua Berisha Braçes nga foltorja e Kuvendit.
Deklarata ishte qartas një thumbim i drejtpërdrejtë ndaj humbjes së ndikimit politik të Braçes në Fier dhe rolit dominues që Belinda Balluku ka marrë në qarkun socialist.
Ndërsa sulmoi qeverinë për çmimin e naftës, Berisha ngriti akuza edhe për kontrabandë të organizuar të karburanteve, duke pretenduar se në Shqipëri hyjnë “400 mijë tonë naftë nga Libia” dhe se kjo, sipas tij, nuk mund të bëhet pa mbështetje qeveritare.
