Struktura e Posaçme kundër Korrupsionit dhe Krimit të Organizuar ka shënuar një tjetër zhvillim të rëndësishëm në luftën kundër korrupsionit dhe pastrimit të parave, duke sekuestruar edhe asete në kriptomonedha.
Sipas të dhënave nga raporti për vitin 2025, SPAK ka sekuestruar kriptomonedha të llojit Tether (USDT) me një vlerë ekuivalente prej 12.4 milionë eurosh, çka tregon se hetimet tashmë po shtrihen edhe në hapësirën digjitale ku shpesh zhvendosen fondet e krimit të organizuar.
Ky zhvillim sinjalizon një rritje të kapaciteteve të hetuesve për të gjurmuar transaksionet financiare edhe në rrjetet e kriptomonedhave, të cilat shpesh përdoren për të fshehur origjinën e parave.
30 zyrtarë të lartë nën hetim
Raporti evidenton se gjatë vitit 2025 janë hetuar 30 zyrtarë dhe ish-zyrtarë të nivelit të lartë, duke konfirmuar se goditjet janë përqendruar në majat e administratës publike dhe politikës.
Në listën e personave të hetuar përfshihen:
• 1 zëvendëskryeministër
• 1 ish-kryetar Kuvendi
• 1 ish-ministër
• 6 ish-deputetë
• 6 kryetarë bashkie në detyrë
• 5 ish-kryetarë bashkie
Nga këta, 18 persona janë dërguar në gjykatë për gjykim, ndërsa 10 prej tyre kanë marrë dënime me vendime të formës së prerë.
Shifrat tregojnë se hetimet e SPAK po prekin gjithnjë e më shumë nivelet e larta të pushtetit, ndërsa për herë të parë në mënyrë të strukturuar janë goditur edhe pasuritë e fshehura në kriptomonedha.
