Kreu i grupit parlamentar të Partisë Demokratike, Gazment Bardhi, ka reaguar pas refuzimit të SPAK për zhvillimin e një takimi me Komisionin Parlamentar të drejtuar nga Fatmir Xhafaj, të cilin e cilëson si “komisioni Xhafaj 2”.
Në një reagim në rrjetet sociale, Bardhi shprehet se përpjekja e qeverisë për të ushtruar presion dhe intimidim ndaj Prokurorisë së Posaçme ka marrë një përgjigje të prerë nga SPAK. Sipas tij, ky refuzim vjen në vazhdën e asaj që ai e cilëson si përplasje të hapur të qeverisë me sistemin e drejtësisë.
Bardhi rendit disa raste, duke përmendur kundërshtimin në Gjykatën Kushtetuese të vendimit për pezullimin nga detyra të zv.kryeministres, zvarritjen e kërkesës së SPAK për heqjen e imunitetit dhe arrestimin e saj, si dhe përpjekjen për të realizuar vizita monitoruese në SPAK përmes deputetëve. Sipas tij, këto veprime përbëjnë një sulm të drejtpërdrejtë ndaj pavarësisë së Prokurorisë së Posaçme.
“Nëpërmjet të ashtuquajturave ‘vizita monitoruese’, qeveria tenton të intimidojë SPAK-un, por ky institucion ka dhënë një refuzim të prerë, duke i konsideruar këto vizita në kundërshtim me ligjin dhe si cenim të pavarësisë kushtetuese”, shprehet Bardhi në reagimin e tij.
Në fund të deklaratës, Bardhi thekson se, sipas tij, asnjë formë presioni apo intimidimi ndaj SPAK nuk do ta shmangë përgjegjësinë përpara ligjit të kryeministrit Edi Rama dhe zyrtarëve të tjerë të përfshirë.
Nga ana e saj, Prokuroria e Posaçme e ka cilësuar kërkesën për takim monitorues si një veprim në kapërcim të ligjit dhe në kundërshtim me parimin e pavarësisë së institucionit.
