Struktura e Posaçme Antikorrupsion (SPAK) ka konfirmuar se aktualisht janë në proces hetimi 14 zyrtarë dhe ish-zyrtarë të nivelit të lartë, mes tyre tre deputetë, një ish-deputet dhe një ish-ministër.
Në një deklaratë për mediat, SPAK bëri të ditur se emrat dhe akuzat specifike nuk mund të bëhen publike për shkak të sekretit hetimor, por hetimet lidhen me vepra penale si korrupsioni, shpërdorimi i detyrës dhe pastrimi i parave.
Gjithashtu, autoriteti konfirmoi se gjatë viteve 2022–2024 janë dërguar letërporosi në disa shtete të huaja për sigurimin e provave shtesë, përfshirë të dhëna nga aplikacione të enkriptuara si SKY ECC, EncroChat dhe ANOM, të cilat janë përdorur nga rrjete kriminale për komunikime të fshehta.
Këto bashkëpunime ndërkombëtare kanë ndihmuar në hetimin dhe zbardhjen e çështjeve të rënda penale në Shqipëri dhe në nivel ndërkombëtar.
