Pas dërgimit të dosjes për gjykim nga SPAK, avokatët e kryebashkiakut të Tiranës, Erion Veliaj, reaguan duke mohuar të gjitha akuzat dhe duke theksuar se nuk ekziston asnjë provë, fakt apo dokument që t’i mbështesë ato. Në reagimin zyrtar, avokatët thonë se në asnjë faqe të kërkesës për gjykim nuk provohet asnjë lidhje midis veprimtarisë së tij si Kryetar i Bashkisë dhe ndonjë privilegj të paligjshëm për ndonjë subjekt privat dhe asnjë abuzim me detyrën publike që i është besuar për tre mandate nga qytetarët e Tiranës; dhe mbi të gjitha, nuk ekziston asnjë provë, fakt apo dokument që të mbështesë akuzat.
Avokatët theksojnë se përkundër përshtypjeve që mund të krijojë deklarata e SPAK-ut, asnjë gjyqtar paraprak apo gjykatë nuk ka shqyrtuar ende ndonjë nga akuzat apo provat në mbështetje të tyre.
“Jemi të shqetësuar nga shpërfillja e normave bazë që udhëheqin zhvillimin e hetimeve dhe ndjekjeve penale në një sistem drejtësie demokratik. Asnjë hetues apo prokuror i pjekur dhe i përgjegjshëm nuk duhet të bëjë deklarata të tilla, pasi kjo shkel prezumimin e pafajësisë dhe tregon ose një keqkuptim themelor, ose një shpërfillje totale të parimeve të drejtësisë penale,” theksojnë avokatët.
Ata shtojnë se, nëse një prokuror mendon se ka “provuar” një çështje sipas standardeve ligjore, kjo është çështje që i takon vetëm gjykatës së shqyrtimit, dhe jo deklaratave publike që mund të ndikojnë tek opinioni publik ose gjykata.
Avokatët e Veliajt bëjnë gjithashtu të ditur se procesi ka karakteristikat e mëposhtme:
ka nisur mbi një kallëzim anonim dhe të falsifikuar;
është zhvilluar për të paktën 7 muaj pa autorizim ligjor të vlefshëm;
është mbështetur në hapje të korespondencave private pa autorizim të gjykatës;
ka përfshirë deklarime vetëinkriminuese të marra nën presion;
është drejtuar nga një individ që nuk ka qenë asnjëherë prokuror ligjërisht i Republikës;
ka shkelur afatet hetimore të përcaktuara nga ligji;
ka mohuar të drejtën e mbrojtjes dhe kundërshtimeve ndaj hetimit.
Avokatët theksojnë se z. Veliaj i është caktuar një masë sigurimi që ata e konsiderojnë të jashtëzakonshme dhe disproporcionale, ndërkohë që ai ushtron mandatin kushtetues si Kryetar i zgjedhur i Bashkisë Tiranë, me mbështetjen e 160 mijë qytetarëve.
“Ne mbetemi të vendosur të çmontojmë, rresht pas rreshti, çdo pretendim të ngritur mbi këtë proces, jo vetëm për të mbrojtur qytetarin e parë të Tiranës, por edhe për të mbrojtur besimin e qytetarëve te drejtësia dhe rendi kushtetues. Çdo rresht i kërkesës së nisur në gjykatë do të çmontohet aty vetë, bazuar në ligj,” përfundon deklarata e avokatëve të Erion Veliajt.
