Sot në orën 9:00, më 19 nëntor, do të kapërcej pragun e SPAK-ut. Këtë herë jo për çështjen “Partizani”, por për të dhënë shpjegime lidhur me një nga ngjarjet më të rënda të 20 viteve të fundit: vrasjen e katër protestuesve më 21 janar 2011 para godinës së Kryeministrisë.
Gjatë 14 viteve që nga dita e ngjarjes, Sali Berishës nuk i ishte marrë asnjë dëshmi për këtë çështje, edhe pse në kohën kur ndodhën vrasjet — të cilësuara si shtetërore — ai ishte Kryeministër. Së fundmi, Prokuroria e Posaçme i dërgoi dy fletëthirrje, por Berisha, duke luajtur me procedurën, refuzoi t’i pranonte dhe kështu shmangu paraqitjen.
Herën e fundit, prokurorët zgjodhën t’ia dorëzonin thirrjen drejtpërdrejt në ambientet e godinës së xhamit, ku ish-Kryeministri kishte shkuar për masën “detyrim paraqitje” në lidhje me dosjen “Partizani”.
Vrasja e Ziver Veizit, Faik Myrtaj, Hekuran Dedës dhe Aleks Nikës më 21 janar mbetet pa dyshim një nga ngjarjet më tronditëse në vend. Berisha pritet të japë shpjegime për prokurorët mbi atë që ndodhi brenda godinës së Kryeministrisë para, gjatë dhe pas protestës së dhunshme të opozitës së kohës.
Pavarësisht një hetimi të mëparshëm, vrasjet e Aleks Nikës dhe Hekuran Dedës nuk janë zbardhur. Ndërsa për Ziver Veizin dhe Faik Myrtajn, dënimet kanë qenë minimaliste: 1 vit për Ndrea Prendin, ish-shefin e Gardës së Republikës, dhe 3 vite për ish-gardistin Agim Llupo.
