Kreu i Grupit Parlamentar të PS, Taulant Balla, ka reaguar lidhur me zërat për përplasje mes ish-ministres Elisa Spiropali dhe kryeministrit Edi Rama.
Në një komunikim për mediat nga Kryesia e Kuvendit, Balla mohoi që Spiropali të ketë shprehur pakënaqësi në mbledhjet e grupit parlamentar të PS-së. Sipas tij, në asnjë moment nuk ka pasur ankesa apo shqetësime të ngritura prej saj brenda grupit.
Ai theksoi se Partia Socialiste ndjek një praktikë të rregullt në fund të çdo sesioni parlamentar, ku bëhet analizë e performancës së çdo deputeti. Në bazë të këtij vlerësimi, mund të kërkohet përmirësim në punë apo të merren vendime të tjera për vijimësinë.
Balla nënvizoi se edhe për Spiropalin do të vlejë i njëjti proces vlerësimi, duke shtuar se çdo vendim do të merret pas dorëzimit të raportit përkatës mbi performancën e deputetëve.
