Ermal Hasimja, një nga emrat e përfolur si kandidat i mundshëm i opozitës për garën në Bashkinë e Tiranës, thotë se sfida për Tiranën është e vështirë dhe se kushdo që futet në këtë garë nuk do të ketë kohën e duhur për t’u përgatitur. “Situata është e vështirë, kushdo që futet në garë do të jetë i papërgatitur. Situata është e papritur, sot presidenti dekretoi zgjedhjet. Koha është e shkurtër, kjo nuk varet as nga unë, as nga kushdo tjetër”, u shpreh ai.
Duke u ndalur te debati i brendshëm mbi tipologjinë e kandidatit të opozitës, Hasimja tha se ky është një diskutim i hapur: “Ai diskutimi a duhet figurë e fortë politike – që mund të jetë nga PD natyrisht, apo nga Partia Mundësia – ose një figurë publike jo politike, është ende i pranishëm. Ka raste në rajon dhe në Evropë ku modele të tilla kanë funksionuar.”
Ai solli si shembull përvoja të ngjashme në qytete të tjera evropiane: “I kuptoj dhe qëndrimet në studio. Ka plot raste jo larg Shqipërisë, ku kandidatë të këtij lloji ja kanë dalë me sukses, si në Bukuresht apo në Budapest. Nuk është se nuk ekzistojnë shembuj të tjerë.”
