Ulsi Manja doli sot hapur me tezën se reforma në drejtësi duhet rishikuar. Në një intervistë me Grida Dumën, ai nisi të fliste për pagat e gjyqtarëve, por brenda pak minutash kaloi te tema për të cilën kishte ardhur në studion e TCH.
“Çfarë do të bëhet me dosjet e prapambetura? Ka ardhur momenti të hapet ky diskutim. Po shfaqen simptomat e një apatie në sistemin e drejtësisë; në KLGJ dhe KLP ka mungesë transparence në vendimmarrje dhe ata e konsiderojnë këtë si diçka që ndodh brenda shtëpisë së tyre,” tha kryetari i Komisionit të Ligjeve, sipas të cilit “ka ardhur koha për diskutimin e temës: a e kanë shqiptarët këtë drejtësi cilësore që iu premtua në 2016?”
Ulsi Manja, si “specialist i drejtësisë”, bëri para Grida Dumës “zbulimin e madh”: Prokuroria është palë- tha ai - ndërsa drejtësinë e presim nga gjykata që duhet t’i trajtojë në mënyrë të barabartë qytetarët shqiptarë. Pikërisht tek gjykatat zoti Manja sheh dhe dobësinë e sistemit.
“U referohem gjykatave të largohen nga roli i noterit dhe të ngrihen në lartësinë që u ngarkon Kushtetuta. Për gjyqtarët ekziston vetëm prova,” tha ai, duke i paralajmëruar magjistratër prerë nga studio e TCH: “Vëreni gishtin mendjes, se do të ndërhyjmë në sistem.”
Me gjasë, kryetari i Komisionit të Ligjeve ka dashur të përcjellë pikërisht këtë mesazh sot në TCH: që reforma në drejtësi, edhe pse Edi Rama mburret se është vepër e PS-së, ka nevojë për ndryshime. Dhe meqë i kanë votat, mazhoranca duket e sigurt në hapat e saj për ta ndërmarrë këtë akt. Ndaj për këtë PS kishte zgjedhur sot lajmëtar Ulsiun…
