Shumëkush mund të ketë pyetur se pse Edi Rama nuk po e thotë me gojën plot se nuk do të lejojë arrestimin e zëvendëskryeministres.
Pse nuk merr fund kjo histori, e për çfarë po kërkon kohë kryeministri?
Nga dita në ditë, bëhet e qartë se ai është mes dy zjarresh: Ballukut që nuk shkon në burg për urdhërat e shefit, dhe Brukselit që është gati t'a ngelë në klasë Shqipërinë nëse SPAK pengohet të godasë në nivele të larta korrupsionin.
Kryeministri zgjodhi papritur të veprojë të enjten, pasi më herët kish thënë që nuk do t'a pranonte dorëheqjen dhe se nuk kishte asnjë urgjencë.
Edi Rama dha të enjten një "provë" për Bashkimin Evropian duke i larguar Belinda Balluku nga qeveria, kur SPAK ka kërkuar në fakt arrestimin e saj.
Edhe pse dita e enjte në vetvete dukej sikur vinte jashtë rendit të brendshëm parlamentar, larg një Seancë plenare, në fakt Edi Rama ishte i detyruar të jepte prova për të premten.
Jo për Tiranën, por për Brukselin. Aty ku Edi Ramës i kishin kërkuar gjatë vizitës së fundit të lejojë arrestimin e Ballukut.
BE solli në Tiranë për t'i dhënë zë mesazhit të saj, David McAllister i cili e bëri të qartë: "Balluku është test kritik për Shqipërinë dhe luftën ndaj korrupsionit".
Nëse të enjten në orët e vona Rama shkarkoi formalisht Ballukun, kjo ndodhi sepse të premten në Bruksel u mblodh COELA (ambasadorët e vendeve anëtare të BE-së), ku u prezantuar
Raporti i Vlerësimit të Përkohshëm të Standardeve (IBAR) për Grupin 1 – Themeloret.
Siç pohojnë burimet diplomatike, oferta e Edi Ramës, largimi i Ballukut, nuk i ka mjaftuar disa vendeve anëtare, mes të tjerave edhe të rëndësishmet Gjermani, që duan arrestim patjetër.
Jo rastësore janë disa sulme që përkrahës qeverisës i bëjnë nivelit të korrupsionit në Gjermani.
Por e premtja nuk ishte dita e vetme. Të Martën dhe të Mërkurën, mbahet Takimi i 17-të i Nënkomitetit BE-Shqipëri për Drejtësinë, Lirinë dhe Sigurinë
(Bruksel, 3-4 Mars 2026).
Vendimmarrja në këtë nënkomision do të tregojë nëse ecim përpara me piketat e ndërmjetme apo ngecim në vend.
A do ja dalë Rama me lobimin e vetë në kancelaritë evropiane të mjaftohen me largimin e Ballukut nga qeveria, apo do të detyrohet të bëjë atë që kërkohet nga SPAK?
EDI Rama nuk ka thënë as po, e as jo. Ai thjesht ka marrë kohë. Deri kur të mundet.
Pyetja që ngel është: a është Edi Rama me këmbët në një këpucë prej Ballukut për të djegur rrugën drejt BE?
