Ndërsa në Shqipëri debati për ndërtimet dhe zhvillimin urban vazhdon të ndezë polemika, qeveria ka zgjedhur një nga skenat më të mëdha ndërkombëtare për të prezantuar projektet e saj. Në panairin global të pasurive të paluajtshme MIPIM 2026 në Cannes, Agjencia e Zhvillimit të Territorit (AZHT) dhe Agjencia Kombëtare e Planifikimit të Territorit (AKPT) kanë paraqitur dhjetëra projekte zhvillimi në Shqipëri.
Sipas njoftimit zyrtar, në pavijonin shqiptar janë prezantuar rreth 100 projekte, nga komplekse banimi deri te resorte turistike, të kuruara nga studio ndërkombëtare arkitekture dhe të orientuara drejt investitorëve të huaj.
Drejtoresha e AZHT, Adelajda Roka, deklaroi se pavijoni shqiptar ka qenë ndër më të vizituarit në panair, ndërsa qëllimi kryesor është promovimi i Shqipërisë si një destinacion i ri për investime në sektorin e ndërtimit dhe real estate.
MIPIM konsiderohet një nga eventet më të rëndësishme globale për industrinë e pasurive të paluajtshme, ku marrin pjesë zhvillues të mëdhenj, banka, fonde investimi dhe kompani ndërtimi nga e gjithë bota. Këtë vit panairi ka mbledhur mbi 20 mijë profesionistë, ndërsa përfaqësuesit shqiptarë kanë zhvilluar takime për mundësi bashkëpunimi dhe investime në projekte të reja në vend.
