Dy nxënës të gjimnazit “Ibrahim Rugova” në Tiranë ndodhen në spital pas plagëve të marra pas një sherri banal të ndodhur në rrugën pranë shkollës. Edhe pse policia u tregua e kujdesshme të theksonte në njoftimin e saj se plagët e të rinjve janë marrë në rrugë, të gjithë e kanë të qartë se sherri ka nisur në shkollë. Në atë institucion që duhet të jetë shembulli i dijes dhe i sigurisë. Ose të paktën ashtu siç pretendon edhe kryeministri, i cili jo më larg se dje në postimet e tij propagandistike, për ironi të fatit, ka shkruar për sigurinë në shkolla.
“Në shkollat publike janë vendosur oficerë sigurie të cilët do të garantojnë mbrojtjen e nxënësve nga çdo fenomen negativ i lidhur me dhunën apo rreziqet online. Falë edhe bashkëpunimit me Ministrinë e Brendshme dhe Ministrinë e Arsimit, janë zhvilluar trajnime specifike për oficerët e sigurisë për të garantuar sigurinë e nxënësve në shkollat publike, ku suport do të jetë edhe Policia e Shtetit dhe Policia Bashkiake të cilët bëjnë monitorimin e tyre në hapësirat brenda perimetrit të shkollave, duke bërë jo vetëm monitorim por dhe parandalimin e incidenteve të ndryshme,” shkruante Rama.
Mesa duket iniciativa e kryeministrit shërben vetëm për propagandën e radhës në rrjetet e tij sociale, pasi mjaftuan vetëm 24 orë për të treguar se siguria në shkolla mbetet kritike. Incidenti i sotëm është në vazhdën e ngjarjeve që nuk shmangen në shkollat e Shqipërisë. Kujtojmë se vetëm pak muaj kanë kaluar nga tragjedia e para një viti, ku konflikti mes të rinjve në shkollë u zhvendos në rrugë dhe mbeti i vrarë 14-vjeçari Martin Cani. Pavarësisht reagimeve të opinionit publik, qeveria ka mbetur vetëm tek premtimet, që nga kamerat dhe satelitët që vëzhgojnë shkollat, e deri tek policët në këto institucione, por asnjëra nuk po funksionon.
