Ashtu siç ishte paralajmëruar, ka nisur protesta e Partisë Mundësia në ambientet e Kryesisë së Kuvendit, aty ku po zhvillohet edhe mbledhja e Këshillit të Mandateve dhe Imunitetit.
Përfaqësues dhe mbështetës të Partisë Mundësia janë mbledhur në Kryesi me pankarta në duar, duke shprehur kundërshtimin e tyre. Situata është shoqëruar me tensione brenda ambienteve të Kryesisë së Kuvendit, ku kryetari i Mundësia, Agron Shehaj, ka protestuar pas derës ku po mbahet mbledhja e Këshillit të Mandateve dhe Imuniteteve.
Në prani të deputetit të Mundësia, Erald Kapri, Shehaj është përplasur me punonjësit e sigurisë, teksa ka kërkuar të hyjë brenda në mbledhje. “Skandal, pse më shtyn?”, dëgjohet të ketë thënë Shehaj gjatë debatit me efektivët e sigurisë.
