Kryetari i partisë “Lëvizja Bashkë”, Arlind Qori, dhe kryetari i partisë “Mundësia”, Agron Shehaj, kanë përjashtuar kategorikisht çdo bashkëpunim politik me Partinë Demokratike të drejtuar nga Sali Berisha, duke theksuar se ekzistojnë dallime të thella morale, politike dhe programore.
Në një lidhje me emisionin “Të Paekspozuarit” në MCN TV, Arlind Qori komentoi iniciativën e hedhur nga Ermal Hasimja për krijimin e një blloku të përbashkët opozitar, duke e cilësuar atë si të papranueshme për “Lëvizjen Bashkë”.
Sipas Qorit, bashkëpunimi me PD-në dhe partitë e tjera tradicionale të opozitës është i pamundur për shkak të asaj që ai e quajti “papajtueshmëri të thellë morale”, duke nisur nga figura e Sali Berishës. Ai theksoi se “Lëvizja Bashkë” është kundër korrupsionit dhe nuk mund të ndajë platformë politike me parti apo figura që, sipas tij, janë të përfshira ose të akuzuara për korrupsion.
Qori deklaroi se do të ishte absurde që forca të tilla politike të dilnin së bashku në protesta, ndërsa një pjesë e tyre kërkon lirimin e figurave si Sali Berisha apo Ilir Meta. “Qëndrimi im është që duhet të jenë të gjithë në burg”, u shpreh ai, duke shtuar se nuk mund të ketë aksion të përbashkët politik me parti që mbrojnë individë që, sipas tij, duhet të përballen me drejtësinë.
Ai akuzoi gjithashtu si Partinë Demokratike ashtu edhe Partinë Socialiste për mungesë kundërshtie reale mes tyre dhe për interesa të përbashkëta, veçanërisht në përpjekjet për të dobësuar reformën në drejtësi. Qori nënvizoi se “Lëvizja Bashkë” ka qëndrime të qarta kundër oligarkisë, kundër shitjes së pasurive kombëtare si Sazani dhe Zvërneci, si dhe kundër kampeve të refugjatëve të ndërtuara nga qeveria italiane në Shqipëri, të cilat sipas tij cenojnë sovranitetin e vendit.
“Nuk ka asnjë parti tjetër sot në Shqipëri që i ngre këto çështje me të njëjtin standard si ne”, deklaroi Qori, duke përfunduar se “Lëvizja Bashkë” nuk do të jetë pjesë e asnjë koalicioni që përfshin partitë e vjetra.
Në të njëjtin emision, kryetari i partisë “Mundësia”, Agron Shehaj, mohoi gjithashtu çdo mundësi bashkimi me PD-në e Sali Berishës. Ai theksoi se është larguar nga Partia Demokratike pikërisht për shkak të problemeve të thella që ajo ka dhe se, sipas tij, asgjë nuk ka ndryshuar që nga ajo kohë.
Shehaj sqaroi se nisma për të nxjerrë një kandidat jashtë partive politike, si rasti i Ermal Hasimes, kishte për qëllim krijimin e një alternative të besueshme për votuesit opozitarë dhe jo bashkimin me partitë tradicionale. Ai theksoi se “Mundësia” është votuar nga rreth 50 mijë qytetarë pikërisht sepse ka mbajtur një qëndrim të qartë kundër Berishës dhe partive të vjetra.
Shehaj u shpreh kundër idesë së një qeverie teknike dhe theksoi se ndryshimet në Kodin Zgjedhor apo garantimi i zgjedhjeve të lira nuk varen nga opozita, pasi shumicën e votave në Parlament i ka Partia Socialiste.
“Ky bashkim nuk ka kuptim”, përfundoi Shehaj, duke theksuar se ndarja me PD-në mbetet thelbësore dhe e pandryshuar.
