Kreu i partisë Mundësia, Agron Shehaj, nga jashtë Kuvendit, ka akuzuar sërish PS dhe PD se po bashkëpunojnë për të ndryshuar Kushtetutën në dëm të partive të reja.
Shehaj theksoi se çdo veprim tjetër i PD-së, që prezantohet si kundërshtim ndaj qeverisë, është thjesht një farsë.
“Opozita dhe mazhoranca ditën e hënë kanë rënë dakord që të ndryshojnë kushtetuën, partitë reja, të zhdukin alternativat e reja. E bënë këtë seancë, një farsë. Të hënën ranë dakord, e sot bëjnë sikur zihen. Interesi i qytetarëve, beteja e madhe, ‘lufta’ që u bë dhe iu tha votuesve që e keqja e madhe është Rama, kjo ka rënë. Kjo po ndodh sot në Kuvend. Teatri i radhës, shfaqja e radhës”, tha Shehaj
Deklarata e tij vjen dy javë pasi Shehaj nënshkroi marrëveshje me Sali Berishën për të mbështetur kandidatin e propozuar nga grupimi i këtij të fundit, Florian Binaj për Bashkinë e Tiranës.
