Sot, Zëvendësdrejtori për Çështjet e Europës Perëndimore dhe Qendrore, Lyn Debevoise, zhvilloi një vizitë në Prokurorinë e Posaçme (SPAK), ku shprehu vlerësimin e qeverisë amerikane për punën e Kryeprokurorit të Posaçëm, Altin Dumani, në bashkëpunim me agjencitë amerikane të zbatimit të ligjit.
Sipas mesazhit zyrtar, fokusi i këtij bashkëpunimi ka qenë goditja e rrjeteve të paligjshme që kërcënojnë sigurinë kombëtare të SHBA-së, si dhe lufta kundër korrupsionit që pengon kompanitë dhe investitorët amerikanë të operojnë në mënyrë të ndershme dhe të sigurt në rajon.
Autoritetet amerikane vlerësojnë se përpjekjet e Altin Dumanit kanë vendosur një standard të ri të bashkëpunimit të fortë mes Shqipërisë dhe Shteteve të Bashkuara kundër organizatave kriminale ndërkombëtare, duke krijuar kushte më të sigurta edhe për kompanitë amerikane që synojnë të investojnë ose të zgjerojnë aktivitetin e tyre.
Në deklaratë theksohet gjithashtu se ky nivel bashkëpunimi pritet të vijojë edhe me drejtuesin e ardhshëm të SPAK-ut, në funksion të mbrojtjes së interesave strategjike amerikane dhe garantimit të një klime të ndershme për biznesin ndërkombëtar.
