E ngarkuara me punë e Shteteve të Bashkuara të Amerikës, Nancy VanHorn deklaroi sot se SHBA-të do ta ndjekin nga afër procesin e zgjedhjes së pasardhësit të Altin Dumanit në krye të SPAK dhe presin që të jetë një proces trasparent dhe i lirë nga ndikimet e jashtme.
“SPAK-u është aq efektiv sa pavarësia e tij për të ndjekur kriminelët, pavarësisht se me kë janë të lidhur. Edhe SPAK-u gjithashtu, sigurisht, i nënshtrohet ligjeve të Shqipërisë. Bazuar në ligj, Z. Dumani, sado efektiv, jashtëzakonisht efektiv që ka qenë, do të zëvendësohet sepse mandati i tij ka përfunduar. Dhe procesi i përzgjedhjes së pasardhësit të z. Dumani duhet të jetë i paanshëm, transparent dhe i lirë nga ndikimet e jashtme.
Ata që dëshirojnë ta shohin Shqipërinë të vazhdojë luftën kundër krimit dhe korrupsionit, përfshirë partnerët ndërkombëtarë, janë shumë të interesuar për këtë proces dhe do ta ndjekin nga afër. Shtetet e Bashkuara presin integritet në përzgjedhjen e Kryeprokurorit të ri të Posaçëm; ashtu siç presim për përzgjedhjen e Drejtorit të ardhshëm të BKH-së”, deklaroi Vanhorn. Sipas të ngarkuarës me punë, SPAK shihet nga SHBA-të si partner i besuar.
“Partneriteti ynë me SPAK-un, i ndërtuar mbi një themel besimi dhe angazhimi me Departamentin tonë të Drejtësisë, tregon ndikimin e bashkëpunimit dhe kordinimit efektiv.
Pra, siç shumë prej jush e dinë, Kryeprokurori i Posaçëm Dumani ishte së fundmi në Uashington për të diskutuar me udhëheqjen tonë se si e luftojmë së bashku krimin këtu dhe në Shtetet e Bashkuara. Dhe ky partneriteti i ligjzbatimit midis Departamentit tonë të Drejtësisë dhe SPAK-ut nuk u ndërtua brenda natës. Dhe së bashku, duhet të mbrojmë atë që kemi ndërtuar”, theksoi ajo, ndërsa shtoi më tej se lufta ndaj organizatave kriminale dhe trafikut të drogës janë prioritet i SHBA-ve.
