Administrata e presidentit amerikan Donald Trump ka nisur një fushatë diplomatike për të shtyrë qeveritë në mbarë botën që të izolojnë më tej strukturat kryesore të regjimit iranian.
Sipas një kabllogrami diplomatik të dërguar të hënën në të gjitha misionet diplomatike amerikane, Departamenti i Shtetit u ka kërkuar ambasadave dhe konsullatave të SHBA që t’u bëjnë thirrje qeverive pritëse të shpallin Korpusin e Gardës Revolucionare Islamike të Iranit (IRGC) dhe Hezbollahun në Liban si organizata terroriste.
Kabllogrami, i shqyrtuar nga Washington Post, udhëzon diplomatët amerikanë që këtë mesazh ta përcjellin deri të premten “në nivelin më të lartë të përshtatshëm” të qeverive ku janë akredituar. Në dokument thuhet gjithashtu se përfaqësitë diplomatike amerikane duhet të koordinohen, sipas rastit, edhe me diplomatët izraelitë për të shtyrë përpara këtë nismë.
Në këtë kontekst zhvillohet edhe seanca e sotme në Kuvendin e Shqipërisë, ku pritet të miratohet një rezolutë që dënon regjimin iranian dhe kërkon shpalljen e IRGC si organizatë terroriste.
Sipas zhvillimeve diplomatike të raportuara nga Washington Post, iniciativa e qeverisë shqiptare mund të shihet edhe si një përpjekje e kryeministrit Edi Rama për t’i paraprirë këtij presioni ndërkombëtar, duke sinjalizuar besnikëri politike ndaj administratës amerikane dhe duke e pozicionuar Shqipërinë mes vendeve të para që rreshtohen publikisht në këtë linjë.
Seanca parlamentare pritet të zhvillohet pa praninë e Partisë Demokratike, e cila ka paralajmëruar se nuk do të marrë pjesë në votimin e kësaj rezolute.
