Sekretari i Këshillit Bashkiak të Tiranës, Behar Zheheli, i është përgjigjur me shkresë zyrtare kërkesës së kryebashkiakut Erion Veliaj, duke e informuar se nuk ekziston asnjë vendim që e ndalon atë të marrë pjesë në mbledhjen e Këshillit.
Në dokumentin zyrtar, që mban datën 22 shtator 2025, theksohet se kërkesa e Veliajt “për t’u njohur, dëgjuar, mbrojtur dhe dhënë shpjegime” në mbledhjen e datës 23 shtator, ora 16:00, është legjitime dhe se Këshilli Bashkiak nuk ka ndërmarrë asnjë masë penguese për praninë e tij.
Megjithatë, Sekretari Zheheli shton se, në rast pamundësie për të qenë fizikisht i pranishëm në mbledhje, Veliaj mund të dërgojë me shkrim vërejtjet dhe qëndrimet e tij, të cilat do të administrohen dhe bëhen pjesë e procesit vendimmarrës.
Kjo mbledhje e Këshillit Bashkiak pritet të zhvillohet pasditen e sotme, ku pika kryesore e rendit të ditës është diskutimi dhe vendimmarrja mbi shkarkimin e Erion Veliajt nga detyra e kryetarit të Bashkisë së Tiranës.
Kujtojmë se sot Komisioni i Çështjeve Ligjore dhe Drejtësisë Sociale rrëzoi kërkesën e Veliajt për të qenë i pranishëm, me votat e shumicës socialiste dhe disa këshilltarëve të tjerë, ndërsa opozita argumentoi se kryebashkiakut duhet t’i njihet e drejta kushtetuese për t’u dëgjuar para vendimit përfundimtar. Burime bëjnë me dije se edhe SPAK nuk ka dhënë autorizim për pjesëmarrjen e tij.
