Parlamenti u mblodh pasditen e sotme me objekt diskutimi problematikat e evidentuara nga deputetët javët e fundit. Përmbytjet nga reshjet e shiut ishin shqetësimet kryesore që u ngritën nga të dyja palët, por nuk munguan as debatet sporadike për politikën e ditës.
Me Ramën në Austri, ku mori pjesë në një konferencë ndërkombëtare, dhe Berishën që është fokusuar te Foltorja numër 2, një pjesë dërrmuese e kabinetit qeveritar dhe deputetëve nuk ishin prezent, entuziazmi mungonte në sallën e Kuvendit.
Përfaqësuesit e opozitës nuk kursyen komentet për arrestimin e ish-shefes së diplomacisë së Bashkimit Europian, Federica Mogherini, duke e lidhur me miqësinë që kishte me kryeministrin Edi Rama dhe çështjen Balluku. Disa deputetë të opozitës kërkuan gjithashtu që në rend dite të futet edhe çështja Mogherini, por kjo nuk u pranua nga kryetari i Kuvendit, Niko Peleshi, me arsyetimin se nuk ishte parashikuar në procedurë.
“Një nga problemet më të mëdha që shqetëson shqiptarët është korrupsioni. Shqetësimi i ngritur është i drejtë, nuk është arrestuar një njeri i thjeshtë por drejtoresha e Kolegjit Evropian të Tiranës, që na e keni tundur për vite me radhë si shembull suksesi, edhe pse ka rrëmbyer tokën e universitetit publik të Tiranës”, tha deputeti demokrat Luçiano Boçi.
Për çështjen “Balluku” foli kreu i partisë Mundësia, Agron Shehaj, i cili tha se kryeministri i Shqipërisë, që ka vartësen e vet të pandehur nga SPAK, po sulmon përditë drejtësinë, SPAK-un dhe prokurorët.
Ndërsa përplasja e sotme opozitë–mazhorancë u zhvillua mes deputetit të PL-së, Tedi Blushi, dhe deputetes socialiste, Zegjine Çaushi. Gjatë fjalës së tij nga foltorja, Blushi ironizoi socialistët dhe qeverinë, e cila sipas tij po jep lëmoshë për pensionistët. Në replikën e saj, Çaushi iu drejtua Blushit duke ironizuar Ilir Metën, i cili ndodhet në qeli.
Një përplasje patën edhe socialisti Ardit Bido me kreun e grupit parlamentar të PD-së, Gazment Bardhi, për ceremoninë me rastin e festës së 28 Nëntorit. Bido akuzoi opozitën se mungesa e tyre në ceremoni përbënte mosrespektim ndaj simbolit kombëtar. Ndërsa Bardhi u shpreh se askush nga demokratët nuk ka përdorur kurrë një ditë bashkimi kombëtar për përçarje politike, duke theksuar se nderimi i flamurit kërkon integritet dhe veprim, jo vetëm pjesëmarrje në ceremoni.
Më pas e morën fjalën deputetët me radhë, ku kishte edhe nga ata që folën për herë të parë.
