Ervin Salianji ka zgjedhur Peshkopinë për të dhënë një nga mesazhet më të forta politike kundër Sali Berisha dhe mënyrës sesi po drejtohet Partia Demokratike. Në një takim me mbështetësit, Salianji deklaroi se pjesëmarrja e lartë e demokratëve është prova më e mirë se gara në PD ekziston dhe se ajo nuk zhvillohet në studio televizive, por “nëpër sheshe”.
I entuziazmuar nga numri i pjesëmarrësve, ai tha se takimet e ardhshme do të jenë edhe më të mëdha, duke paralajmëruar se “shumë shpejt i pret Tirana”, madje duke shtuar se ritmi i mbështetjes mund t’i çojë tubimet deri në stadium.
Deklaratat e Salianjit vijnë në një moment kur protestat e organizuara nga Berisha në Tiranë kanë shfaqur një rënie të dukshme të pjesëmarrjes, kontrast që ai vetë e përdori për të theksuar se fryma e demokratëve nuk kontrollohet nga “një lidership uzurpues”.
“Kjo është përgjigjja më e mirë për këdo që thotë se nuk ka garë. PD nuk uzurpohet dhe nuk ecet dot mbrapsht”, deklaroi ai në nisje të fjalës së tij.
Salianji tha se, pavarësisht humbjeve dhe mënyrës sesi është administruar partia gjatë 13 viteve të fundit, PD mbetet e vetmja forcë që mund të sjellë ndryshim politik në vend. Por, sipas tij, kjo mund të ndodhë vetëm nëse partia rikthehet te vlerat themeluese dhe hapet ndaj garës së brendshme.
Në fjalimin e tij ai sulmoi drejtpërdrejt Berishën edhe për qëndrimet ndaj ambasadorit të Bashkimit Evropian në Tiranë, Silvio Gonzato, duke thënë se sulmet ndaj diplomatëve nuk përfaqësojnë Partinë Demokratike, por interesat personale të një njeriu që “e ka marrë peng partinë”.
“Shqipëria dhe PD nuk mund të jenë një frëngji nga ku gjuhen ambasadorët”, u shpreh ai.
Më tej, Salianji e bëri Berishën përgjegjës për qëndrimin e gjatë të PD në opozitë, duke deklaruar se ai “nuk mund ta sjellë PD në pushtet as sot, as nesër dhe as kurrë”. Sipas tij, çdo ditë që Berisha qëndron në krye të partisë është humbje për opozitën dhe ndihmë direkte për Edi Rama.
Ai e quajti Berishën “dinozaur të politikës” dhe simbol të së shkuarës, ndërsa shtoi se përjashtimi i zërave kritikë dhe kundërshtarëve të brendshëm është rruga që do ta çojë PD drejt shuarjes politike.
“Kur Sali Berisha nuk më mund dot mua duke pasur listën, mediat dhe regjimin, si do ta mundë Ramën?”, deklaroi Salianji, duke kërkuar hapjen e partisë, lejimin e fraksioneve dhe respektimin e mendimit ndryshe brenda demokratëve.
