Ish-deputeti i Partisë Demokratike Ervin Salianji deklaroi në A2 CNN se lëvizja që ka ndërmarrë ka si qëllim rizgjimin e forcës së tij politike. Sipas tij, ky qëllim tashmë ka nisur të japë efekt. “Besoj se kjo ka ndodhur. Ky format e ka realizuar qëllimin. PD sot është më aktive, më e zgjuar, është më shumë prezente në media dhe pa diskutim ka nevojë për ndryshim, ku disa kritere duhet të përcaktohen për mënyrën se si avancohet karriera në PD, qoftë përmes primareve, votave apo çdo kriteri tjetër që vendoset”, u shpreh Salianji.
Ai theksoi se problemi më i madh brenda partisë lidhet me pakënaqësinë e krijuar nga neglizhenca apo braktisja e demokratëve nga drejtues të caktuar në zona të caktuara. “Janë qindra dhe mijëra demokratë që mendojnë si unë se PD duhet të ripërtërihet”, tha Salianji.
Sipas tij, opozita po dështon të shfrytëzojë politikisht skandalet e qeverisë. “E mbani mend se çfarë bënë socialistët për një video të Ilir Metës. Ndërsa opozita sot nuk po arrin të kapitalizojë. Për shkak të ndalimit për të kandiduar në Parlament, unë kam folur në platformat e mia në rrjetet sociale dhe në takime me njerëzit”, u shpreh ai.
