Ervin Salianji ka lëshuar kritika të forta ndaj lidershipit të PD gjatë një takimi me strukturatnë Vlorë, duke theksuar se opozita nuk mund të vazhdojë të mbetet humbëse dhe se ndryshimi duhet të vijë nga brenda partisë. Gjatë fjalës së tij, Salianji deklaroi se qeveria qëndron në pushtet edhe për shkak të dobësisë së opozitës.
“Qeveria qëndron në këmbë edhe për faj të pafuqisë së opozitës. Duhet të shkojmë te guximi për t’u hapur dhe për të pranuar njerëz të rinj. Shqipëria ka energji dhe potencial njerëzor, por PD duhet t’u japë zë qytetarëve dhe kjo bëhet me më shumë demokraci brenda partisë,” u shpreh ai.
Salianji kritikoi mënyrën se si, sipas tij, po funksionon opozita dhe tha se politika nuk duhet të jetë privilegj i një grupi të vogël njerëzish rreth lidershipit.
“Politika nuk është për disa njerëz të privilegjuar që rrinë rrotull lidershipit, por për ata që punojnë dhe sakrifikojnë. Ndryshimi do të vijë nga këto salla, nga njerëzit që janë këtu dhe jo nga ata që flenë mbi dafina për shkak të privilegjeve,” tha ai, duke bërë thirrje për bashkim për të sjellë rotacion politik në vend.
Në fjalën e tij, Salianji ngriti edhe pyetjen për përgjegjësitë pas humbjeve elektorale të Partisë Demokratike dhe kërkoi reflektim nga drejtuesit e saj.
“Përse nuk përjashtohen ata që e ngrenë zërin për ta mbajtur PD në humbje? Opozita nuk duhet të funksionojë si një klub i mbyllur shokësh dhe nuk duhet të ketë frikë nga konkurrenca,” tha ai.
Ai shtoi se drejtuesit politikë duhet të mbajnë përgjegjësi për rezultatin e zgjedhjeve, duke theksuar se nuk mund të vazhdohet me justifikimin se përgjegjësinë e ka vetëm qeveria.
“Nuk mund të vazhdojmë të themi se ‘fajin e ka Rama’. Ai duhet larguar, por ne duhet të gjejmë njerëzit e duhur. Kryetari i PD mban përgjegjësi për gjithçka që i ka ndodhur partisë,” deklaroi Salianji.
Ai kritikoi gjithashtu mënyrën e organizimit të partisë, duke thënë se shumë kontribuues po përjashtohen dhe se kjo dëmton besimin e anëtarësisë dhe të partnerëve ndërkombëtarë.
“Nuk mund të trajtohen njerëzit si budallenj dhe të vazhdohet me të njëjtat gënjeshtra prej 13 vitesh. Miqtë ndërkombëtarë presin vizion, ndërsa ne vazhdojmë të flasim me një gjuhë politike të vjetëruar,” u shpreh ai.
Në përfundim, Salianji theksoi se Partia Demokratike duhet të jetë një parti e hapur dhe meritokratike për të rikthyer besimin e qytetarëve dhe për t’u bërë një alternativë reale qeverisëse.
