Ervin Salianji zhvilloi sot në Lezhë një takim entuziast me anëtarë dhe simpatizantë të Partisë Demokratike. Ish-deputeti demokrat dha një mesazh të qartë politik, duke theksuar se nuk ka asnjë projekt për krijimin e një force tjetër politike dhe se e ardhmja e tij mbetet brenda PD-së.
“Nuk krijoj forcë tjetër politike, shtëpia ime është PD. PD do ta ndryshojmë, do ta bëjmë fituese”, u shpreh Salianji përpara mbështetësve.
Nga Lezha, ai theksoi se problemi kryesor nuk janë demokratët që reagojnë dhe kërkojnë ndryshim, por lidershipi që, sipas tij, nuk i dëgjon dhe nuk prodhon ide për t’i përfaqësuar ata.
“E shohim si 5 fantastikët që rrinë në lidershipin e PD nuk dëgjojnë shqetësimet e demokratëve. Shqetësim janë ata që nuk dëgjojnë, jo demokrati i thjeshtë. Nuk është shqetësim pse mblidhemi nga salla në sallë gjithnjë e më shumë, por pse lidershipi i PD është braktisur. Shqetësim nuk janë idetë tona, por mungesa e ideve të tyre që po i largon demokratët”, deklaroi Salianji.
Ai kritikoi ashpër drejtimin aktual të PD-së, duke e përshkruar si të shkëputur nga baza dhe të përqendruar te privilegjet personale, ndërsa demokratët, sipas tij, vazhdojnë të qëndrojnë të bashkuar dhe të vendosur për ndryshim.
Në fjalën e tij, Salianji nënvizoi se forca reale e Partisë Demokratike buron nga vota dhe mbështetja e anëtarësisë dhe se asnjë lider nuk mund të pengojë bashkimin e demokratëve për të sfiduar qeverinë aktuale dhe për ta rikthyer PD-në në një forcë fituese.
