Ervin Salianji, i pranishëm në mbledhjen e Kryesisë së PD-së, ka folur për mediat pak para nisjes së takimit, duke u shprehur hapur në favor të protestave, madje duke shkuar më tej, drejt revoltave qytetare.
Sipas tij, fokusi duhet të jetë përballja e drejtpërdrejtë me qeverinë dhe dëgjimi i çdo shqetësimi qytetar. Salianji tha se nëse Partia Demokratike nuk arrin t’i përkthejë shqetësimet e demokratëve në energji reale proteste, do ta ketë të vështirë të mobilizojë qytetarët, ashtu siç ka ndodhur deri tani.
“Është momenti që të fokusohemi tek protesta, tek revolta, përballja me qeverinë, te dëgjesa e çdo shqetësimi qytetar. Nëse nuk jemi të aftë t’i përkthejmë në energji shqetësimet e demokratëve, do ta kemi të vështirë, siç po e kemi, për të bërë protesta. Rruga e duhur janë revoltat, jo foltoret para Kryeministrisë”, u shpreh Salianji.
Ai shtoi se këtë qëndrim e ka përsëritur në çdo mbledhje të Kryesisë dhe se shpreson që kjo të reflektohet në vendimmarrjen e ardhshme të strukturave drejtuese të partisë. Salianji theksoi gjithashtu se ka qenë i pranishëm në çdo protestë dhe se i është nënshtruar gjithmonë vendimmarrjes së partisë.
