Lëvizja “Bashkë”, partia “Shqipëria Bëhet” dhe “Mundësia” kanë refuzuar ftesën e Sali Berishës për t’u ulur në tryezën e thirrur prej tij për koordinimin e aksionit opozitar. Kryetari i Partisë Demokratike deklaroi sot në një konferencë për shtyp se nuk dëshiron t’i paragjykojë këto qëndrime deri në momentin kur tryeza të nisë konkretisht nga puna.
Të premten, Berisha ka ftuar partitë opozitare në një takim për të diskutuar mbi aksionin e përbashkët opozitar, por gjithçka tregon se dy partitë opozitare parlamentare, ajo e drejtuar nga Agron Shehaj dhe ajo e Arlind Qorit, nuk do të marrin pjesë. I njëjtë pritet të jetë edhe qëndrimi i Adriatik Lapajt, i cili prej javësh proteston para Kryeministrisë dhe çdo të hënë i lë simbolikisht hapësirën Partisë Demokratike dhe Berishës, por duket se nuk ka ndërmend të ulet në tryezën e thirrur prej tij.
Sali Berisha bëri të ditur se, përveç partive opozitare, në këtë tryezë janë ftuar edhe përfaqësues të shoqërisë civile. Megjithatë, mbetet e paqartë nëse mes të ftuarve do të jetë edhe ish-deputeti demokrat Ervin Salianji. Vetë Berisha ka deklaruar disa herë se Salianji ka shkelur disa “vija të kuqe”, çka e bën të vështirë rikthimin e tij si pjesë aktive e lëvizjes opozitare.
Në këto kushte, tryeza e Berishës rrezikon të mbetet me një pjesëmarrje të kufizuar, ku sipas sinjaleve të deritanishme, pritet të bashkohen kryesisht aleatët tradicionalë të PD-së, Fatmir Mediu dhe Nard Ndoka, ndërsa pjesa tjetër e opozitës vijon të mbajë distancë.
