Partia Demokratike duket se po largohet gjithnjë e më shumë nga retorika e saj për “masakrën elektorale”, ndërsa përgatitet të hyjë në zgjedhjet për Bashkinë e Tiranës. Në kontrast me akuzat e vazhdueshme ndaj qeverisë për manipulim zgjedhor, kreu i PD-së, Sali Berisha, ofroi një justifikim të pazakontë për vendimin e partisë për të marrë pjesë në zgjedhje.
Në një prononcim për mediat, jashtë sallës së Parlamentit, Berisha u pyet se si është e mundur që PD e akuzon Edi Ramën për vjedhje zgjedhjesh, por gjithsesi zgjedh të hyjë në garë me të. Përgjigjja e tij ishte se bojkotimi i zgjedhjeve kërkon organizimin e protestave guerile, të cilat sipas tij, nuk përputhen me natyrën e PD-së.
“Ka dy taktika, dy qëndrime. Ka qëndrimin e bojkotit dhe është ajo, mund të përdoret, por ajo kërkon të përgatisësh lëvizje guerile, e tjera e tjera, që ne nuk jemi. Nuk jemi parti e lëvizjeve guerile”, u shpreh Berisha.
Kjo deklaratë bie ndesh me të shkuarën e afërt politike të vetë Berishës. Jo më larg se viti 2022, kur ai organizoi një protestë të dhunshme për të marrë selinë e PD-së, pas përjashtimit nga strukturat drejtuese të partisë, ngjasonte më shumë me lëvizjet guerile, të cilat sot thotë se nuk i përfaqëson.
Për më tepër, Partia Demokratike, përveçse nuk ka ndërmarrë protesta serioze apo bojkot institucional, deri më tani nuk ka as një emër të qartë kandidati përballë Ogerta Manastirliut në Tiranë. I pyetur nga gazetarët për emrat potencialë, Berisha deklaroi se PD ka “jo një, por disa kandidatë”, por nuk dha asnjë emër konkret.
