Ish-kryeministri Sali Berisha do ta nisë 2026 në dyert e SPAK. Ai do të paraqitet të hënën, me datë 5 janar në godinën e xhamtë për masën e sigurisë “detyrim për paraqitje”. Para godinës së Prokurorisë së Posaçme me gjasë do të paraqiten disa nga deputetët e tij besnikë, referuar një mesazhi që është shpërndarë në grupet e punës së PD-së. Sali Berisha po gjykohet për akuzën e korrupsionit lidhur me aferën “Partizani”. Bashkë me të akuzohen dhe dhëndrri i tij Jamarbër Malltezi dhe disa persona të tjerë. Berisha pret këtë janar edhe vendimin nga Gjykata Kushtetuese lidhur me masën e sigurisë.
