I mbani mend primaret? Procesin që do zgjidhte kandidaturat për deputetë të PD? Tashmë që ka kaluar kohë jo të gjithë e kujtojnë debatin e madh që u bë në PD, emrat në listën e mbyllur dhe degradimin e procesit të primareve që u trumbetua me të madhe nga Sali Berisha. Një nga turpet më të mëdha të këtij procesi ishte lista e Tiranës, mbushur tej e tej me emra pa ndonjë peshë por ku mbizotëronin emrat e partive aleate. Partia Lirisë, Republikane apo dhe PDIU, e cila futi në listën e mbyllur të PD-së së Tiranës Mesila Dodën. Që jo më larg se sot ka vendosur të mos jetë pjesë e asnjë prej grupeve parlamentare të opozitës, por të qëndrojë si e pavarur.
Thënë ndryshe e pavarur nga opozita dhe e varur tek ndonjë interes tjetër më i madh se të qenurit në opozitë. Të kësaj opozite që sakrifikoi fituesit e primareve të saj për t’i bërë vend kandidates së Shpëtim Idrizit. Partia e të cilit, me të në krye, mori në Tiranë plot 1786 vota në zgjedhjet parlamentare të 11 majit.
Duke vendosur Mesilën e pavarur, Sali Berisha la jashtë listës së sigurt Ilir Alimehmetin, Jorida Tabakun apo Hysen Kadiun. Fituesin e primareve që sot, teksa sheh Mesila Dodën të vetëshpallur deputete të pavarur, mund të pyesë me të drejtë: sa herë i duhet PD-së të zgjedhë Mesilën deputete në listë të mbyllur që të kuptojë se mandati i saj i kaluar dhe ky i tanishmi janë thjesht pjesë e një pazari të vogël politik?
