Ish-ministri i Jashtëm Ditmir Bushati ka reaguar për vendimin e Bashkimit Europian për përfshirjen e Ukrainës dhe Moldavisë në regjimin roaming pa pagesë. Kjo politikë u lejon njerëzve që ta përdorin celularin – të flasin, të shkruajnë e të lundrojnë në internet – njëlloj si në vendin e tyre, kudo në territorin e BE-së, sikundër në vendet që janë pjesë e Zonës Ekonomike Europiane (Islanda, Lihtenshtajni, Norvegjia) apo në Mbretërinë e Bashkuar.
Në planin politik, është e pashpjegueshme, sipas Bushatit, “përse BE-ja nuk ka ndërmarrë ende të njëjtën vendim për vendet tona, të cilat, prej më shumë se dy dekadash presin të jenë pjesë e BE-së”.
Ndërsa në planin praktik, kjo do të përbënte një lehtësi të madhe për qytetarët e rajonit. “Gjashtë vendet e rajonit tonë kanë përqafuar prej kohësh një politikë roaming pa pagesë midis tyre. Në dallim prej Ukrainës dhe Moldavisë, në Ballkanin Perëndimor nuk ka asnjë pjesë territori nën pushtim ku mund të vihet në pikëpyetje se cili është rrjeti i mbulimit të operatorëve celularë. Gjithashtu, numri i qytetarëve dhe abonentëve i vendeve të rajonit tonë është më i vogël krahasuar me atë të Ukrainës. Për pasojë, humbjet financiare të operatorëve celularë do të ishin më të vogla, ndërkohë që përfitimet praktike të qytetarëve të mëdha”, thekson Bushati.
Ai nënvizon se “është koha që BE-ja të zbatojë, pa humbur kohë, të njëjtën politikë edhe për vendet e Ballkanit Perëndimor”.
