Kreu i Strukturës së Posaçme Kundër Korrupsionit dhe Krimit të Organizuar (SPAK), Altin Dumani, në një intervistë në RTSH, ka folur mbi procesin e Reformës në Drejtësi dhe domosdoshmërinë e ruajtjes së pavarësisë së sistemit të prokurorisë nga çdo ndikim politik.
Dumani e konsideroi shkëputjen e drejtësisë nga ndikimi politik si arritjen më të madhe të Reformës në Drejtësi, duke theksuar se ky është përfundimi më i mirë që mund të ketë kjo reformë për të garantuar një sistem të drejtë dhe efektiv.
Sipas tij, pavarësia e prokurorëve të posaçëm — si nga drejtuesit e prokurorisë (pavarësia e brendshme), ashtu edhe nga faktorët e jashtëm (pavarësia e jashtme) — është elementi më i rëndësishëm që ka ndodhur në institucionin e prokurorisë pas nisjes së reformës.
“Vlerësoj se duhet ruajtur kjo pavarësi ndaj institucionit të prokurorisë. Aktualisht kjo pavarësi është e garantuar nga Kushtetuta e Shqipërisë dhe nga ligjet e tjera. Të ruhet, pasi kontribuon në pasjen e ndjekjes penale, si dhe rezultate konkrete në luftën kundër krimit të organizuar dhe korrupsionit. Kjo pavarësi shoqërohet edhe me llogaridhënie,” tha Dumani.
Në lidhje me pyetjen nëse drejtuesi i SPAK duhet të raportojë në Kuvend, Dumani sqaroi se ligji aktual nuk është shumë i qartë për këtë çështje, duke kujtuar se drejtuesi i Prokurorisë së Posaçme nuk zgjidhet nga Kuvendi, por nga Këshilli i Lartë i Prokurorisë (KLP).
Megjithatë, ai theksoi se deputetët kanë të drejtë të informohen për punën e institucionit dhe të shprehin shqetësimet e tyre lidhur me veprimtarinë e tij.
“Unë, pavarësisht seancave të gjata dhe pyetjeve që ndonjëherë nuk duhet të bëhen, vlerësoj që deputetët kanë në të drejtën e tyre që të informohen për punën e institucionit, si dhe të adresojnë shqetësimet që kanë ata në raport me vijueshmërinë e institucionit,” deklaroi kreu i SPAK.
Dumani tha se e respekton Kuvendin e Shqipërisë dhe gjatë raportimeve, ai flet para deputetëve, dhe jo të pandehurve faktik ose potencial.
