Prokurori i Përgjithshëm, Olsian Çela, kritikoi draft-kodin e ri Penal të inicuar nga Ministria e Drejtësisë, duke e quajtur represiv në përmbatje dhe joserioz në hartim.
Duke raportuar të martën para Komisionit të Ligjeve në Kuvend, Çela, tha se Kodi Penal në fuqi mund të ketë pasur nevojë për përmirësime, por jo ndryshim të bazave të tij, duke e gjetur të pabazuar argumentin e përdorur nga nismëtarët se kodi në fuqi është i vjetëruar pasi është miratuar nga viti 1995.
“Fryma është represive, përderisa shtohen dispozita dhe norma që bëjnë të dënueshme sjellje të caktuara shoqërore. Tani pyetja është; kjo është ideja e hartuesit, apo kjo është një politikë që u ngarkua nga qeveria, Ministria e Drejtësisë apo Komisioni i Ligjeve, si erdhëm në këtë pikë?”- argumentoi Çela para deputetëve.
Sipas Çelës, nuk mund të kalohet nga një kod me rreth 400 nene në një kod me mbi 900 nene se duket sikur në shoqërinë shqiptare paska pasur një paligjshmëri të madhe dhe shumë veprime që kanë qenë të padënuara, do të dënohen.
Më tej kryeprokurori argumentoi se ka një problem në konceptimin e draftit.
“Nuk jemi në gjendje të rishkruajmë normat, kjo është e pamundur. Duhet të kishte një dokument të politikës mbi të cilën të ndërtohej akti,” tha ai.
Sipas tij, ka munguar përcaktimi i drejtë i metodologjisë se si do të organizohej puna në përgatitjen e draftit, duhej të përcaktoheshin nevojat para se të niste puna për draftin.
Ai i cilësoi të padobishme tryezat e konsultimeve nëpër rrethe me prokurorët, duke shtuar se kjo ishte përgjegjësi institucionale që ka nevojë për metodologji dhe jo tryeza.
“Nëse duam të bëjmë diçka serioze duhet ngritur një grup ekspertësh dhe t’i bëjmë një vlerësim, pa qenë ata që e kanë bërë se janë të njëanshëm në vlerësim,” propozoi më tej ai.
Drafti i një kodi të ri penal që u bë publik në verë nga qeveria si një punë e ekspertëve të drejtësisë, ndërsa drejtori i Shkollës së Magistraturës, ish-kryeprokurori Arben Rakipi, mori në mbrojtje hartimin e neneve në dokument, të cilat u kundërshtuan menjëherë nga shoqëria civile.
Ky draft ndër të tjera u kritikua sepse kriminalizon shpifjen dhe zbut dënimet e korrupsionit për zyrtarët e lartë.
Organizatat e lirisë së medias kërkuan ndryshimin e dispozitave që lidhen me shpifjen duke shprehur shqetësim se ato cënojnë lirinë e medias, sigurinë e gazetarëve dhe bien në kundërshtim me standardet europiane./BIRN
