Reporterët pa Kufij i është përgjigjur deklaratave të kryeministrit Edi Rama lidhur me raportin e saj për lirinë e medias, ku Shqipëria renditet në vendin e 83-të, me një rënie prej tre pozicionesh krahasuar me një vit më parë.
Në reagimin e saj, organizata thekson se vlerësimi nuk lidhet me komunikimin qeveritar, por me tregues konkretë të lirisë së medias në vend, përfshirë presionin politik, transparencën dhe sigurinë e gazetarëve.
“Kryeministër Edi Rama, ne masim lirinë e medias, jo komunikimin e qeverisë. Renditja e Shqipërisë në vendin e 83-të (-3) në Indeksin 2026 pasqyron sulmet politike, abuzimin me organet e zbatimit të ligjit, transparencën e ulët të medias dhe kërcënimet ndaj gazetarëve,” thuhet në reagim.
Deklarata e Reporterëve pa Kufij erdhi pas një postimi të mëhershëm të kryeministrit Rama, i cili kishte vlerësuar një raport të SIGMA-OECD mbi Agjencinë për Media dhe Informim (MIA), duke ironizuar kritikat ndaj qeverisë për gjendjen e medias.
Në raportin e saj për Shqipërinë, Reporterët pa Kufij theksojnë se gazetarët përballen me presion politik, vështirësi në aksesin e informacionit dhe sulme që synojnë diskreditimin e tyre, si nga qeveria ashtu edhe nga opozita. Po ashtu, sipas organizatës, centralizimi i komunikimit qeveritar ka ndikuar negativisht në transparencë.
Pas reagimit të organizatës, Rama ka replikuar duke sugjeruar që raportet e ndryshme ndërkombëtare të lexohen në mënyrë të krahasuar, pasi sipas tij ekzistojnë mospërputhje në vlerësime mbi funksionimin e medias dhe komunikimit institucional në Shqipëri.
