Deputetja Jorida Tabaku ka mbështetur deklaratën e Gazment Bardhit se PD duhet të marrë pjesë në komisionin për Reformën Territoriale.
Ndryshe nga qëndrimi i kreut të PD, Sali Berisha, për të bojkotuar komisionin, Tabaku, në një intervistë për A2 CNN, u shpreh se partia nuk duhet të përsërisë gabimet e së shkuarës dhe luftën duhet ta bëjë brenda institucioneve.
“Ky është një vendim që sigurisht i takon strukturave të Partisë Demokratike. Unë mendoj se PD nuk duhet të përsërisë gabimet e së shkuarës dhe, së dyti, duhet të jetë aty në institucione për të bërë luftën atje. Ka shumë kolegë që thonë ‘nuk na marrin parasysh, nuk na përfshijnë’, dhe kjo është e vërteta faktikisht. Por unë mendoj se jemi në një fazë ku kemi treguar sa e keqe është qeverisja, por ne duhet të jemi aty për të bërë betejën tonë,” tha Tabaku.
Deputetja e PD replikoi edhe me raportuesin për Shqipërinë në Parlamentin Europian, Andreas Schieder, lidhur me deklaratën që 'opozita të zëvendësojë molotovin me debat'. Tabaku theksoi se protesta është një mjet europian i shprehjes së pakënaqësisë dhe se problemi real nuk janë molotovët, por mbrojtja politike e korrupsionit.
