Një nga të shqetësuarit nga ana e mazhorancës për policët që u plagosën në protestë, ishte edhe ish-ministri, Ervin Hoxha. Ai mori fjalën për të akuzuar opozitën duke thënë se do t’i djeg të gjallë policët, ndërsa replikoi dhe më deputetin e Lëvizjes Bashkë, Redi Muçi duke e akuzuar se po nxiste përdorimin e molotovit.
“Ju i hidhni policëve molotovë, doni t’i digjni të gjallë. Është e turpshme, këtu i referohem edhe deputetit Muçit që tha ‘sugjeroj sa më shumë molotovë’”. Ore je në terezi apo nuk je në terezi? Çfarë sugjeron ti molotov?, tha deputeti Hoxha.”, tha Hoxha.
Në përgjigjen e tij, Redi Muçi, i kujtoi ish-ministrit Hoxhaj se ndjeshmërinë për policët e tregoi në rastin e efektivit Azbi Spahiu, i cili tentoi vetëvrasjen nga presioni i madh që kishte pasi kishte arrestuar të birin e oligarkut. Sipas tij, Hoxha atëherë ish-ministër i Brendshëm, nuk mbajti asnjë përgjegjësi.
“Po i drejtohem për replikë ish-ministrit i cili përmendi këtu policët dhe dhunë ndaj policëve. Por kur ishte ministër, nuk pati kurajon të mbante përgjegjësi për policin Azbi Spahiu, i cili nga presioni i madh u detyrua të hidhej nga lartësia se kishte arrestuar të birin e oligarkut. Ky është ministri i policisë pra”, tha Muçi.
Kujtojmë se ngjarja për të cilën i referohet deputeti i Lëvizjes Bashkë, është e janarit të vitit 2025, ku polici Spahiu ndaloi Martin Manen, djalin e biznesmenit Samir Mane, pasi kishte goditur disa mjete të parkuara në rrugë dhe kishte refuzuar të bënte testin e alkoolit. Pas këtij veprimi, Azbi Spahiu, ishte thirrur nga AMP dhe ishte kërkuar llogari për veprimet që ka kryer.
Gjendur në kushte presioni ai i ka shkruar të birit duke thënë se po i shkatërronin karrierën me lojëra, ku më pas tentoi vetëvrasjen duke u hedhur nga lartësia.
