Kreu i Partisë Demokratike, Sali Berisha, ka paralajmëruar rikthimin e protestave të opozitës, duke theksuar se një qeveri teknike “nuk do të krijohet kurrë, nëse opozita nuk e imponon vetë”.
“Qeverinë teknike nuk ta krijon kush nëse nuk e krijon vetë, po nuk e imponove vetë. Prandaj shqiptarët, nëse duan të votojnë të lirë, të përgatitemi për betejën tonë, për protestën tonë për votën e lirë. Qeveri teknike ne kërkojmë, por të jeni të sigurt se pa zërin tonë të fuqishëm në rrugët dhe sheshet e këtij vendi ajo nuk krijohet. Ne duhet të ngrihemi dhe do ngrihemi. Kjo nuk ka diskutim,” deklaroi Berisha.
Gjatë konferencës për shtyp, lideri i opozitës e quajti Parlamentin aktual “më armiqësorin ndaj shqiptarëve në historinë 32-vjeçare”, duke e akuzuar për paaftësi dhe korrupsion, si dhe për miratimin e ligjeve “pa asnjë diskutim real”.
Megjithatë, Partia Demokratike nuk ka zhvilluar ende një analizë të humbjes në zgjedhjet e 11 majit, të cilat ajo i konsideron të manipuluara. Pavarësisht kësaj, shumë nga pretendimet e PD-së janë të pasqyruara në raportin e OSBE/ODIHR, që evidenton problematika në administrimin dhe transparencën e procesit.
