Kryeministrit Edi Rama nuk i del e keqja me gjyqtarin e gjykatës Administrative, Hazbi Balliu, për vendimin që lidhet me pallatin e konfiskuar nga KKT-ja. Në një reagim tjetër në facebook, kryeministri kësaj radhe ka komentuar kohën që i është dashur gjykatësit për të marrë vendimin që sipas tij është i gabuar.
“As 10 minuta nuk i janë dashur gjyqtarit Balliu që t’i dalë kundër shtetit dhe të marrë anën e paditësve që kanë bërë një pallat të tërë pa leje, i cili u konfiskua si i tillë e iu dha Agjencisë Shtetërore të Kadastrës. Materialet që institucionet i vunë në dispozicion Balliut duan shumë më tepër se 9 minuta të lexohen, por natyrisht që gjykatësi as nuk i ka lexuar, sepse i ka mjaftuar fakti që në godinën e vjetër të ASHK, e cila është bërë e pasigurt nga tërmeti, nuk ka pasur viktima. Kësisoj, sipas tij, puna mund të vazhdonte nën tavanët që binin, ndërsa pallatin pa leje… shohim e bëjmë” – shkruan Rama.
Bëhet fjalë për një hotel 6-katësh pranë Liceut Artistik, ku qeveria kishte planifikuar të vendoste Agjencinë Shtetërore të Kadastrës.
Por, sado i gabuar të jetë një vendim gjykate, rruga e shtetit është vetëm një, gjykata. Vetëm se Rama, i mësuar prej katër mandatesh të japë urdhra e të tjerët t’i zbatojnë, duket se harron se drejtësia nuk është në varësinë e tij. Reagimet e njëpasnjëshme, më shumë se çdo gjë tjetër, tregojnë maninë e një kryeministri që, kur nuk i pëlqen vendimi, e kthen në spektakël publik. Sepse në Shqipëri, edhe gjykatësit e kanë të vështirë të shpëtojnë nga statuset e tij.
