Kryeministri, Edi Rama, i ka dalë sërish në mbështetje ish-drejtoreshës së AKSHI-t, Mirlinda Karçanaj, e akuzuar nga SPAK për abuzime me tenderat. Në prezantimin e drejtorit të ri, Igli Tafa, kryeministri nuk harroi ta falenderonte publikisht për kontributin e saj në administratën publike.
Rama madje dënoi çdo sulm që hidhet ndaj Karçanajt, pasi sipas tij, ka qenë e para që vinte në punë dhe fundit që largohej.
“Në radhë të parë desha të vij vetë për të bërë një falënderim për Linda Karcanajnë, e cila ka punuar pranë meje për 2 dekada, që kur kemi qenë në bashkinë e Tiranës. E njoh si një njeri të përkushtuar ndaj funksionit dhe shërbimit publik në këtë vend. Ju e njihni dhe besoj së ndani mendimin se Linda ka qenë e para që vinte në punë dhe fundit që largohej”, tha Rama.
Në tentativë për ta veçuar ish-drejtoreshën e AKSHI-t nga pjesa tjetër e të akuzuarve, kryeministri tha se nuk ka dijeni për kompanitë e përfshira në hetimin e SPAK, por ka dijeni se Linda është një nënë e vetme me dy fëmijë.
Vetëm se harroi se bashkë me Karçanajn i akuzuar për abuzime me tenderat është dhe Ergys Agasi dhe Ermal Beqiri. Nuk dihet a i vjen keq shefit të qeverisë për këta dy të fundit.
Në fakt, deklaratat e Ramës duke i qarë hallin Karçanajt janë një hipokrizi bajate. Duke qenë se po bëhet fjalë për një të akuzuar nga SPAK për korrupsion dhe po hetohet si grup i strukturuar kriminal, më e pakta që duhet të bëjë kryeministri, është të hesht dhe të pres përfundimin e hetimeve.
Sepse më me interes për shqiptarët është si janë menaxhuar dhe ku kanë shkuar miliona eurot e taksave të tyre, dhe jo nëse Karçanaj ka shtëpi apo ka dy fëmijë, siç Ramës po i dhimbset shpirti sa herë flet për të.
