Në takimet që duket se paralajmërojnë nisjen e fushatës për zgjedhjet vendore të vitit 2027, kryeministri Edi Rama zhvilloi sot një takim me pensionistët në Tiranë. Si kategoria më e madhe elektorale në vend pas emigrimeve masive, pensionistët janë rikthyer sërish në qendër të vëmendjes politike, ku premtimet për rritje pensionesh mbeten një refren i përsëritur.
Pavarësisht se pensionet, edhe pas rritjeve të befta të qeverisë, vijojnë të mbeten të pamjaftueshme për të përballuar koston e lartë të jetesës dhe çmimet e ushqimeve, kryeministri Rama përsëriti objektivin që pensioni minimal të arrijë në 200 euro deri në vitin 2030.
“Nga janari merrni pensione më të larta. Çdo janar pensioni do të rritet. Janarin e ardhshëm do të jetë dyfishi, në janar 2028 trefishi, në 2029 katërfishi dhe në 2030 pesëfishi, për të arritur objektivat që kemi shpallur me ju”, deklaroi Rama.
Megjithatë, objektivi mbetet i shtrirë për një kohë të gjatë dhe mbetet për t’u parë nëse do të realizohet në praktikë. Por edhe në rast se arrihet pensioni minimal prej 200 eurosh, me këtë vlerë nuk mjafton për të përballuar kosotot e jetës në ditët e sotme, e jo më pas 4 vitesh që mund të rriten dhe më tej. Kjo do të thotë se kësaj shtrese i premtohet rritje për mbijetesë, e jo për dinjitet.
Në këtë kuptim, “rritja” e pensioneve mbetet një objektiv i përsëritur politik, i cili më shumë shërben për premtim elektoral afatgjatë sesa si zgjidhje e menjëhershme për problemet reale të kësaj kategorie.
Megjithatë, Rama nuk i kurseu edhe lajkat kundrejt pensionistëve duke thënë se këta të fundit e njohin politikën më mirë se 90% të deputetëve dhe prandaj duhet të votojnë në shumicë dërrmuese Partinë Socialiste.
