Kryeministri Edi Rama u ndal sot tek sfidat e sigurisë, duke theksuar rrezikun e tensioneve të shtuar në rajon, sidomos në Balltik, pas ndërhyrjeve me dronë dhe avionë luftarakë rusë. Ai deklaroi se Shqipëria është nën sulme të vazhdueshme kibernetike nga Irani, por sipas tij, vendi ka një nga mbrojtjet më të forta në Europë.
“Sa i përket shënjestrimit për sulme kibernetike, ne kemi sot një prej mbrojtjeve më të forta kibernetike në Europë. Ndonëse jemi ende shënjestër e një armiku, Iranit, ne po i zmbrapsim dhe ata nuk po arrijnë ta thyejnë mbrojtjen tonë kibernetike”, tha Rama.
Megjithatë, kreu i qeverisë pranoi indirekt se pavarësisht mbrojtjes që ai e konsideron të fortë, të dhënat e qytetarëve shqiptarë – që sipas ligjit duhet të ruhen nga qeveria – janë tashmë të ekspozuara dhe të aksesueshme nga kushdo. Ky fakt vjen pas publikimit të vazhdueshëm të databazave shtetërore në internet vitet e fundit, ku informacionet sensitive të qytetarëve, nga numrat e kartave të identitetit e deri tek të dhënat e pagave, kanë qarkulluar pa asnjë pengesë.
Deklarata e Ramës vjen në një moment kur siguria kibernetike mbetet një nga temat më të ndjeshme për Shqipërinë, ndërkohë që sulmet e sponsoruara nga shtete të huaja po shoqërohen me dyshime të forta mbi paaftësinë e institucioneve vendase për të mbrojtur privatësinë e qytetarëve.
