Kryeministri Edi Rama zhvilloi edhe këtë të diel podcastin “Flasim”, ku nuk i kurseu lavdet për qeverisjen e tij, nga rritja ekonomike e deri tek pagat, pensionet dhe institucionet. Rama i përmblodhi të gjitha në një fjali të vetme, që në fakt më shumë duken si një iluzion i bukur sesa propagandë e radhës.
“Ekonomia rritet, pensionet dhe pagat rriten, investimet vendase dhe të huaja shtohen, mbështetja për më të dobëtit dhe pacientët me sëmundje të rënda zgjedhoret është rritur, ndërkohë që asnjë taksë nuk parashikohet të rritet dhe puna e institucioneve përmirësohet hap pas hapi”, tha Rama.
Por, për qytetarët që jetojnë në Shqipëri, realiteti duket krejt ndryshe. Ekonomia është rritur aq shumë sa shqiptarët po largohen masivisht jashtë vendit. Pagat dhe pensionet mbeten më shumë si lëmosha përballë çmimeve të larta në markete dhe kostove të jetesës.
Shumë kompani të huaja mbyllin fabrikat për shkak të rënies së euros dhe goditjes së eksporteve. Pacientët, sidomos ata të Onkologjikut, vazhdojnë të jenë të lënë në mëshirë të fatit pa ilaçe dhe aparatura të domosdoshme, sipas raportimeve të KLSH dhe denoncimeve në media. Institucionet, nga ana tjetër, punojnë aq “mirë” sa hetimet e SPAK zbulojnë korrupsion në nivele të larta pothuajse çdo muaj.
Megjithatë, në sytë e kryeministrit, Shqipëria ka arritur një stad të paprecedent përsa i përket dinjitetit dhe respektit ndërkombëtar.
“Këtë javë kemi pasur dhe mbledhjen parë mes dy qeverisë Shqipëri-Itali në historinë tonë, një ditë e veçantë në të gjithë hisotirnë e marrëdhënieve ndërkombëtare të vendit tonë. Shqipëria në një stad si kurrë më parë përsa i përket dinjitetit dhe respektit ndërkombëtar”, tha Rama.
Me siguri kryeministri nuk e ka fjalën për “dinjitetin” që vendi po gëzon në botë si një nga destinacionet kryesore të pastrimit të parave të karteleve ndërkombëtare të drogës. Mjafton të përmendet sanksionimi i fundit nga SHBA ndaj familjes Hysa, të përfshirë në aktivitete të pastrimit të parave të kartelit të Sinaloas përmes biznesve të tyre. Hysa ka biznese edhe në Shqipëri, ndërsa është përfolur për takimet që ka pasur me kryeministrin Edi Rama.
