Në një video që nis si përgjigje ndaj atyre që e kritikojnë për deklaratat ndaj vendimit të GJKKO për Ballukun, kryeministri Edi Rama e ka quajtur sërish pezullimin si një ndërhyrje e pushtetit gjyqësor në pushtetin ekzekutiv. Rama pretendon se shtrirja e krahut të gjyqësorit përtej kufirit ndarës me ekzekutivin do të krijonte një precedent të rrezikshëm.
Ndërsa për kritikët, ai tha se nuk bën presion ndaj askujt, por është palë në proces duke i dhënë legjitimitetin vetes të flasë për këtë çështje.
“E kam ankimuar unë, natyrisht si kryeministër dhe jo si Edi Rama, dhe natyrisht jo për një individ, një ministër që në këtë rast është edhe zëvendëskryeministër, por për parimin. Për parimin e moscenimit të balancës mes pushteteve. Për parimin e mosndërhyrjes së një pushteti të pavarur në përbërjen e pushtetit të pavarur ekzekutiv. Për parimin e mosmarrjes së kompetencave të kryeministrit dhe të presidentit nga një prokuror dhe një gjykatës.
Nëse pezullimi i një ministri nga një prokuror dhe një gjykatës sot do të legjitimohej si një e drejtë e ligjshme e drejtësisë, atëherë shtrirja e krahut të gjyqësorit përtej kufirit ndarës me ekzekutivin dhe me vetë jetën politike shqiptare do të krijonte një precedent të rrezikshëm dhe kërcënues.
Është një betejë institucionale gjyqësore për të mos lejuar atë që nga Komisioni i Venecias konsiderohet shkelje e palejueshme e kufirit ndarës mes pushteteve. Pra, unë jam palë dhe flas si palë, nuk i bëj presion askujt dhe nuk flas për një proces gjyqësor që zhvillohet diku dhe nuk ka lidhje me rolin tim”, tha Rama.
Kryeministri gjithashtu lëshoi një tjetër mesazh për Gjykatën Kushtetuese, për vendimin që duhet të marrë.
“Mua nuk më mbetet vetëm të përsëris urimin tim që Gjykata Kushtetuese e Republikës së Shqipërisë t’ia kursejë Republikës së Shqipërisë shpikjen e një risie totalisht të pamirëseardhur në historinë e drejtësisë demokratike europiane”, tha ai.
